തഗ് ലൈഫ് എന്ന സിനിമയ്ക്ക് ഓക്കേ പറയാൻ കാരണം എന്ത്? മറുപടിയുമായി തൃഷ

കമൽഹാസനും മണിരത്‌നവും വർഷങ്ങൾക്കിപ്പുറം ഒന്നിക്കുന്ന തഗ് ലൈഫ് എന്ന സിനിമ റിലീസിന് ഒരുങ്ങുകയാണ്. വലിയൊരു താരനിര തന്നെ ഭാഗമാകുന്ന സിനിമയിൽ തെന്നിന്ത്യൻ നായിക തൃഷയും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. കമൽഹാസൻ-മണിരത്‌നം കോംബോയ്ക്കൊപ്പം വർക്ക് ചെയ്യുക എന്ന ആഗ്രഹം കൊണ്ടാണ് താൻ തഗ് ലൈഫിന്റെ ഭാഗമായത് എന്ന് പറയുകയാണ് തൃഷ ഇപ്പോൾ.

കമൽഹാസനും മണിരത്‌നത്തിനുമൊപ്പം താൻ സിനിമകൾ ചെയ്തിട്ടുണ്ട്. എന്നാൽ ഇരുവരും ചേർന്നൊരു സിനിമ ഒരുക്കുമ്പോൾ അതിന്റെ ഭാഗമാകാൻ ഏറെ ആഗ്രഹിച്ചിരുന്നു എന്ന് തൃഷ പറഞ്ഞു. തഗ് ലൈഫിന്റെ പ്രൊമോഷന്റെ ഭാഗമായുള്ള പ്രസ് മീറ്റിൽ സംസാരിക്കുകയായിരുന്നു നടി.

'കമൽഹാസൻ-മണിരത്‌നം കോംബിനേഷൻ കാരണമാണ് ഞാൻ ഈ സിനിമ തിരഞ്ഞെടുത്തത്. ഇരുവർക്കൊപ്പവും വർക്ക് ചെയ്തിട്ടുണ്ടെങ്കിലും കമൽഹാസൻ സാറും മണിരത്‌നം സാറും ഒന്നിച്ച് വർക്ക് ചെയ്യുന്നത് കാണാൻ ഞാൻ ആഗ്രഹിച്ചു. അതുപോലെ നായകൻ പോലുള്ള സിനിമകൾ കണ്ട് വളർന്ന വ്യക്തിയാണ് ഞാൻ,' എന്ന് തൃഷ പറഞ്ഞു. കമൽഹാസനൊപ്പം മന്മഥൻ അമ്പ്, തൂങ്കാവനം എന്നീ സിനിമകളിലും മണിരത്‌നത്തിനൊപ്പം ആയുധ എഴുത്ത്, പൊന്നിയിൻ സെൽവൻ 1, 2 എന്നീ സിനിമകളിലും തൃഷ പ്രവർത്തിച്ചിട്ടുണ്ട്.

ജൂൺ അഞ്ചിനാണ് തഗ് ലൈഫ് തിയേറ്ററുകളിലെത്തുന്നത്. നീണ്ട 37 വര്‍ഷങ്ങള്‍ക്ക് ശേഷം കമൽ ഹാസനും മണിരത്നവും ഒന്നിക്കുന്ന സിനിമയാണ് തഗ് ലൈഫ്. ജോജു ജോർജ്, അഭിരാമി, ഐശ്വര്യാ ലക്ഷ്മി, നാസർ, അശോക് സെല്‍വന്‍, അലി ഫസല്‍, പങ്കജ് ത്രിപാഠി, ജിഷു സെന്‍ഗുപ്ത, സാന്യ മല്‍ഹോത്ര, രോഹിത് ഷറഫ്, വൈയാപുരി തുടങ്ങിയവരാണ് സിനിമയിലെ മറ്റു കഥാപാത്രങ്ങളെ അവതരിപ്പിക്കുന്നത്. രാജ്കമൽ ഫിലിംസ് ഇന്റർനാഷണൽ, മദ്രാസ് ടാക്കീസ്, റെഡ് ജയന്റ് മൂവീസ്, ആർ മഹേന്ദ്രൻ, ശിവ അനന്ത് എന്നിവർ ചേർന്നാണ് ചിത്രത്തിന്റെ നിർമ്മാണം.

മണിരത്നത്തിനൊപ്പം പതിവ് സഹപ്രവർത്തകരായ സംഗീതസംവിധായകൻ എ ആർ റഹ്മാനും എഡിറ്റർ ശ്രീകർ പ്രസാദും ഈ ചിത്രത്തിലും ഒരുമിക്കുന്നുണ്ട്. നേരത്തെ മണിരത്നത്തിന്റെ കന്നത്തിൽ മുത്തമിട്ടാൽ, ആയുധ എഴുത്ത് എന്നീ ചിത്രങ്ങളിൽ പ്രവർത്തിച്ചിട്ടുള്ള ഛായാഗ്രാഹകൻ രവി കെ ചന്ദ്രനാണ് പുതിയ ചിത്രത്തിന്റെ ക്യാമറ കൈകാര്യം ചെയ്യുന്നത്. വിക്രമിന് വേണ്ടി കമലുമായി സഹകരിച്ച അൻപറിവ് മാസ്റ്റേഴ്സിനെയാണ് ആക്ഷൻ കൊറിയോഗ്രാഫി ചെയ്യുന്നത്. തഗ് ലൈഫിന്റെ മേക്കപ്പ് രഞ്ജിത്ത് അമ്പാടിയും പ്രൊഡക്ഷൻ ഡിസൈനറായി ശർമ്മിഷ്ഠ റോയ്യും കോസ്റ്റ്യൂം ഡിസൈനറായി ഏകാ ലഖാനിയുമാണ് ചിത്രത്തിൽ പ്രവർത്തിക്കുന്നത്.

Content Highlights: Trisha talks about working in Thug Life movie